O‘zbekistonlik tadbirkor Mansurjon Nurmatov Turkiyada nufuzli mukofotga sazovor bo‘ldi

Turkiyada faoliyat yuritayotgan o‘zbekistonlik tadbirkor Mansurjon Nurmatov xalqaro biznes maydonida erishgan yutuqlari uchun yuksak e’tirofga sazovor bo‘ldi. U yaqinda “İş Dünyası Başarı Ödülü” – ya’ni “Biznes olamidagi muvaffaqiyat mukofoti” bilan taqdirlandi.

Mukofot xalqaro savdodagi faollik uchun berildi

Mazkur mukofot Turkiya ishbilarmon doiralari tomonidan har yili muvaffaqiyatli loyihalar, iqtisodiy hamkorlik va investitsiya faoliyatida alohida o‘rnak bo‘layotgan shaxslarga topshiriladi. Mansurjon Nurmatov ushbu sovrinni xalqaro savdo va konsalting sohasidagi muhim hissasi uchun oldi.

U asos solgan World Media Consulting kompaniyasi hozirda O‘zbekiston va Turkiya o‘rtasida faol iqtisodiy hamkorlikka ko‘prik bo‘lib xizmat qilmoqda. Kompaniya tadbirkorlik, marketing, eksport-import, yarmarka va biznes tadbirlarini tashkil qilish borasida ikki davlat o‘rtasida ko‘plab muvaffaqiyatli loyihalarga bosh-qosh bo‘lgan.

“Bu mukofot faqat men uchun emas, balki ikki davlat o‘rtasidagi do‘stona va ishonchli hamkorlikni anglatadi. Oldinda yana ko‘plab loyihalar bor,” — dedi Nurmatov taqdirlash marosimida.

World Media Consulting ayni damda O‘zbekistonning turli hududlaridan kelayotgan tadbirkorlarga Turkiyada o‘z faoliyatini boshlash, hamkor topish, mahsulot eksporti va marketing strategiyasini ishlab chiqishda keng ko‘lamli xizmatlar ko‘rsatmoqda.

Bu kabi e’tiroflar o‘zbekistonlik yoshlar va biznes vakillari uchun ham katta motivatsiya bo‘lib xizmat qilishi shubhasiz. Tashabbuskor, zamonaviy fikrlovchi va xalqaro tajribaga ega tadbirkorlar O‘zbekistonning global iqtisodiyotdagi o‘rnini yanada mustahkamlashga hissa qo‘shmoqda.